Aurtengo uztaila eta abuztua bitartean VI. Intxaur pilota txapelketa jokatuko da Zizurkilgo Intxaur pilotalekuan. Zizurkilgo Udalaren eta Pilotaren Txokoaren lankidetzari esker antolatzen den ekimena da, eta aurtengoa seigarren edizioa izango da. Hain zuzen ere, 2020an lehen edizioa jokatu zenetik seigarren urtez jarraian jokatuko da txapelketa. 

Ostiral honetan hasiko da lehia bizia, bi partida jokatuko baitira, hurrenez hurren. Hortaz, datorren asteetan, pilotaz gozatzeko aukera paregabea izango da Zizurkilen. Uztailaren 17an hasi eta abuztuaren 13ra arte luzatuko da txapelketa. Zehazki, Zizurkilgo herriguneko festetan emango zaio amaiera VI. Intxaur pilota txapelketari; izan ere, festen egitarauaren baitan jokatuko diren azken partidetan erabakiko da zein pilotarik eskuratuko duen txapela eta, ondorioz, garaipena.

Ohi legez, hainbat maila eta kategoria izango ditu txapelketak. Alde batetik, promesa mailako txapelketa jokatu da; eta, bestetik, elite mailako partidak ere izango dira. Gainera, emakume kategoria ere izango du txapelketak. Bada, kategoria guztietako EAEko, Nafarroako eta Errioxako pilotari hoberenak izango dira Zizurkilen. 

Afizionatu txapelketa honetan puntako pilotariek parte hartzen dute, eta, horregatik, Ainhoa Larrea Unzain Zizurkilgo Udaleko Kirol Teknikariak zera azpimarratu du: “Azkeneko urteetan profesionaletara salto egin duten pilotari asko pasa dira gure txapelketatatik”. 

Bestalde, bere lekutxoa du txapelketak Zizurkilgo Herriguneko festen baitan, finala festetan jokatzen baita. Eta Izarne Zelaia Arratibelek, Kultura, Euskara eta Gazteria zinegotziak horrexek txapelketak “herriarekin duen errotze maila handitzen” duela gaineratu du. 

Pilotariak eta partida egunak

Guztira hamasei pilotarik parte hartuko dute. Promesa mailan Madina, Arnaolea, A. Eguiguren, Nazabal, Sarasibar, Ramirez, Beitia eta Olasagasti izango dira. Elite mailan, berriz, Albizu, Etxaniz, Irribarria, Lizeaga, Olaizola, J. Alberdi, Cestau eta Hormaetxea. Emakumeen kategorian Arrillaga, Erasun, Gamindez eta Zabaleta arituko dira.

Hain zuzen ere, Zelaiak emakumeen kategoria azpimarratu du: “Intxaur Pilota Txapelketan emakumezkoen kategoria izatea garrantzitsua da guretzat, emakumezkoen pilota sustatu nahi dugu eta herritarrei deia egiten diegu emakumezkoen pilota partidez gozatzera hurbildu daitezen”.
Bide batez, txapelketako partida guztiak ikusteko aukera izango da eta lau egunetan jokatu dira sailkapeneko zazpi partidak. Hau da, lehen hiru egunetan (uztailak 17, uztailak 18 eta uztailak 24) bi partida ikusteko aukera izango da, eta uztailaren 26an partida bakarra eskainiko da. Partida horixe, 18:00tan jokatuko da; besteak, aldiz, 12:00tan. 

Hortaz, finalaurrekoak abuztuaren 1ean eta abuztuaren 8an iritsiko dira. Eta final handia, abuztuaren 13an jokatuko da, aipatu bezala, Zizurkilgo herriguneko festen baitan. Emakumeen kategoriako partidak finalaurreko eta finaleko egunetan jokatuko dira. Partida guztietan sarrera doakoa izango da. 

Hona hemen txapelketaren kartelak: