Hurrengo astean hainbat ekintza daude prestatuta Plazida Otaño liburutegian, urriaren 24a Liburutegien Eguna dela eta.

Urriaren 17tik 22ra bitartean, Plazidaren mozorro-jolasa egingo da liburutegian. Arantxa eta Irene liburuzainek Maria Altuna Lizarragak sortutako Plazidaren irudia mozorrotuko dute ipuinetako pertsonaien arroparekin, eta umeek asmatu egin beharko dute zertaz mozorrotuta dagoen. Jolasa 6 eta 10 urte arteko haurrei zuzenduta dago, eta mozorro guztiak asmatzen dituztenei opari bana emango diete Liburutegien Egunean. Horrez gain, urriaren 18, 20 eta 21ean bailarako 3-4 urteko umeek bisita egingo dute Plazida Otaño liburutegira.

Urriaren 18an, asteartean, euskarazko literatura-tertulia izango da, 18:00etan, Plazida Otaño liburutegian Erika Elizariren Zendabalitz liburua oinarri gisa hartuta. Oihana Iguaranek gidatuko du tertulia.

Eta asteari amaiera biribila emateko, irakurketa kolektiboa egingo da urriaren 22an, euskaraz eta gaztelaniaz, goizeko 11:00etan hasita, Plazida Otaño liburutegian. Irene Vallejok idatzi eta Fernando Reyk itzulitako Infinitua ihi batean (El infinito en un junco) liburuaren irakurketa egingo da.

Zizurkil eta Lladoko herritarrek irteera berezia egin dute gaur. Amaiurrera joan dira, bertako gaztelua eta historia gertutik gertura ezagutzera.

Amaiurko herri alkate Ixabel Aleman, Baztango alkate Joseba Otongo, Aranzadi Zientzia elkarteko Juantxo Agirre Mauleon eta Amaiurko museoko Amaia Elizagoien zituzte zain, ongi-etorria egiteko. Amaiurko elkartean elkarrekin gosaldu ondoren, Juantxo Agirrek azaldu die gazteluaren indusketei nola ekin zieten. Herriaren ekimena izan zen eta ARanzadi elkarteak elkarlanari ekin zion.Herrigintzak berak izan zuen Amaiurko museoa egiteko ekimena. Etorkizunari begira dago gainera museoa, eta epe ertainean zabalduko dute museoa ez ezik jatetxea eta bestelako zerbitzuak hartuko dituen etxea.

Museoan, Juantxo Agirre Mauleonek eman du Amaiurre egindako lan arkeologikoen inguruko berri, baita gaiaren inguruan sortzen joan den errelatoaren inguruko berri ere.

Gaztelura joateko aukera ere izan dute bisitariek. Aurrez museoan entzundako azalpenak bertatik bertara ikusi ahal izan dute modu horretan. Oso gustura jaso dituzte azalpenak bertaratutakoek. Museotik ateratakoan, bitxikeria ederra bizitu dute gainera. Izan ere, Amaiurko gazte batek Lladoko Alkatea Quim Tremoleda ezagutu eta agurtu baitu. Amporda inguruan egin diren indusketa batzuetan parte hartutakoa zen emakumea, eta alkatea ezagututa, gerturatu egin da.

Zizurkilgo Udalak eskerrak zein Lladokoak eman nahi dizkie Aranzadi Zientzia elkarteari, Baztango Udalari, Amaiurko herriari eta museoari eta Zizurkilgo herrira gerturatzeko gonbita luzatu nahi die.

Urriaren 12an Zizurkilgo Udalak zabalik mantenduko ditu bere zerbitzuak.
Udal bulegoak, kultur etxeak, liburutegia..., zabalik izango dira ohiko ordutegian.

Dena aldeko izan zuen 2022ko Azoka Bereziak. Eguraldi bikaina egin zuen eta jendea gogotsu gerturatu zen herrigunera. Postuetan barrena pasiatu eta erosketak egiteko aukera baliatu zuten askok eta askok.

Zimiterioa, Pedro Mari Otaño plaza, Teodoro Hernandorena kalea eta Intxaur pilotalekua postuz bete ziren. Denetarik aurki zitekeen bertan, nola artisauen produktuak, hala jaki goxoak. Artisau askok euren lana bertatik bertara ezagutzeko aukera eskaini zuten gainera.

Goizeko 10:30etan ireki zituen ateak azokak eta, ordurako, jendea iristen hasia zen. Doako autobus zerbitzua goiz osoan zehar izan zen martxan eta askok baliatu zuten aukera hori. Beste askok, eguraldi bikainak lagunduta, oinez gerturatzeko erabakia hartu zuten.

San Millango belazea izan da aurtengo azokako berrikuntza nagusia. Bertan jarri dituzte ikusgai pottokak eta, haurrek pottoka gainean ibiltzeko aukera ere izan zuten. Gozatu ederra hartu zuen batek baino gehiagok.

Eguerdiko 13:30ak aldera, Iriarte atzeko gunean bildu zen arreta osoa. Llado eta Zizurkilen arteko senidetzea irudikatzeko, lledoner bat landatu zuten bertan. Egun hauetan zehar senidetze jaia dago martxan; Lladotik etorritako herritarrekin batera, hainbat ekitaldi ari dira gauzatzen, 2014an gorpuztutako senidetzea berresteko. Lledoner zuhaitza izango da senidetze horrek lekuko.