Eskualdean barrena igaroko da Euskal Herriko Itzulia apirilaren 8an. Alkizara igo ondoren Asteasuko errepidean barrena etorriko dira txirrindulariak eta Olentzoko bidegurutzea hartuta, Zizurkilera igoko dira.

Herrigunea zeharkatuta, beheranzko bidea hartuko dute eta, Zubiaurretxoko bidegurutzera iritsitakoan, Aduna aldera jarraituko du lasterketak.

Arratsaldeko 15:30ak aldera espero da lasterketa Zizurkilen izatea. Txirrindularitza-zaleek gozamenerako aukera polita izango dute, lehen mailako txirrindulariak bertatik bertara ikusiz. Itzuliko laugarren etapa izango da gure herria zeharkatuko duena, Gasteizen hasi, eta Hondarribian amaituko dena.

Errepideak itxita egongo dira lasterketa igarotzen den bitartean eta beharrezkoa izango da zainketa lanak egiten ari direnen jarraibideak betetzea.